Т. С. Садыков, Р. Р. Қайырбеков, С.В. Тимченко

XX ғасырдың екiншi жартысы мен XXI ғасырдың басындағы дүниежүзi тарихы қазiргi заманмен тығыз байланысты әрi сипаты мен мән-мағынасы жағынан алуан түрлi оқиғаларға толы болды. Дүниежүзi бiр-бiрiне қарсы тұрған қоғамдық-саяси екi жүйеге бөлiнiп, «қырғиқабақ соғыс» орын алды. Азия мен Африка елдерiнде ұлт- азаттық қозғалыстар өрши түстi, сондай-ақ жаңа тәуелсiз мемлекеттер құрылып, әлемде ғылыми-техникалық революция жүрiп жатты. Адам баласы ашық ғарышқа шықты, КСРО құлады. Шығыс Еуропа елдерiнде және Кеңес Одағы құрамында болған республикаларда социалистiк жүйе ыдырады. Қос полярлы жүйе күйреп, халықаралық қатынастардық жаңа құрылымы қалыптасты, қазiргi заманның жаһандық мәселелерi туындады және оларды шешу жолдары iздестiрiлдi, мiне, бұлар қазiргi тарихи дәуiрдiң негiзгi оқиғаларының тiзiмiн құрайды.